خەونێکی سەوز!!!!

خەو بە دووگیانبوونی خۆمەوە
دەمگرێ،
بە سەوز بوونەوە
لە باخەڵی فێنکی تۆدا،
بە بۆنی ئاو .

خەیاڵ
بە نەرمیی دەستە ئاوریشمییەکانی تۆوە
دەمخاتە سەر دڵی باخچەیەکی
تەڕ، تەڕ.
گیانم مێرگی سۆز دەگرێ،
لەژێر تریفەی گۆناتا.
ڕوحم بەسەر قورسایی ،
پێخەفی شەوێکی تاردا ،
چراکان دادەگیرسێنێ،
من و هەموو جەستەم ،
لە ئامێزی گەرمتا،
خەو بە تۆ و، سەوزایی و، ئاوەوە دەبینین،.

گەر تۆم هەبێ،
بە ئەسپایی بە کۆڵانە تەسکەکانی شاردا،
ڕەت دەبم؛
چراکان هەڵدەکەم،
گەر تۆش ون بی،
هەر چی ڕووناکیی مانگە،
دەیخەمە ژێر هەورێکی چۆڵ.
تۆ دەزانی خەیاڵی من هەر تەنها تۆی!

خۆزگە لە کاتی گیانەڵادا
پەنجەت لێک بنێ پەلکەی چاوم
ئەوسا بیرم ناچێ
کە ئاسمانم بە تاریکییەوە جێهیشت

کوێستان عومەرزادە